« A religione hè una pensata articulata, una spiecazione di u mondu » [1]. (Dumézil)

 U studiu di u raportu trà « u religiosu » è a religione, à partesi da un corpus di dati rilativu à e pratiche, à l’usi, à i simbuli in azzione durante u calendariu religiosu festivu di a Corsica, palesa u logos di a religione pupulare corsa, è permette di caratterizà a nuzione di « religiosità pupulare » cum’è una variabile culturale insulare di i grandi schema liturgichi è/o ideulogichi.

A sucietà corsa funziuneghja segondu à a matrice catolica. A so dimensione spirituale s’hè sprufundata à a segonda metà di u XXu seculu per via di e mutazione subbitanie è prufonde ch’ella hà cunnisciutu a sucetà corsa à st’epuca quì. È puru a matrice ferma in a so dimensione culturale è cuntinueghja à fà funziunà a sucetà animata da un penseru di trasmissione di u patrimoniu.

U gruppu decide à traversu à e so scelte di ciò ch’ellu hè è di ciò ch’ellu ùn vole micca esse. E feste religiose custituiscenu un patrimoniu culturale immateriale tamantu. Ma ùn sò nè una vitrina folklorica, nè una riprisentazione museale, sò stonde campate è a pietà pupulare chì ci si manifesteghja lega u gruppu in u sacratu di cumunione vitale.

L’inghjocu di sta ricerca hè di mette à gallu a manera chì i schema di religiosità pupulare accatizzanu u sacratu di cumunione à traversu à l’analisa di a struttura cumplessa di e feste religiose, dumandendu ci, in fine, si e feste religiose, chì facenu à spessu oghje l’ogettu d’un riacquistu, si puderebbenu definisce cum’è l’archettippu induv’ella s’arradicheghja l’unità identitaria di a cumunità corsa.

[1] Mircéa ELIADE & Georges DUMEZIL. Traité d’histoire des religions. Payot. 2019