Sò tessuta
Sò tessuta
di rossu
rossu stracciatu
di a cinta russiccia
intinta di u sudore settembrinu
di tutte e sichere
Sò tessuta
di verde
verde di u mandile verdognu
strettu à collu per e strade di u straziu
di tutte e figliere
Sò tessuta
di turchinu
turchinu di u scuzzale sculuritu
cusgitu è ricusgitu da a manu stroppia
grembiu di u stantu stancu
di tutte e cugliere
Sò tessuta
di necru
necru di e rubacce necre
indulurite da i doli doppii
di tutte l’angunie
Sò tessuta
di giallu
giallu di a camisgiola ingiallita
frustata da l’innamuratura ardita
da e stonde d’amore à l’orlu
di tutte e saziere
Sò tessuta
di biancu
biancu di e linzole sbiancate
albariate è balcate da e mammane manesche
cuglitore mute di i sogni
di tutte e suminere
Lucia Santucci, Sò tessuta, In. Rigiru, n° 17, p.20
Spiecazione in corsu
In l’anni 70, a piazza di i donni in a litaratura corsa era debbuli. Com’iddi a scrivini l’autori di a rivista, “e donne corse, quessa si sapia, sò state sempre a lea è forse u ruvime di a puesia pupulare corsa, invece chì di st’ultimi anni paria ch’elle fussinu quasi cà ammutulite”. Musa di i pueti, i donni erani dinò, in a sucità tradiziunali, abbaddatadori è cantaiani a nanna. È puri, incù a sparizioni di st’usi, pariani “ammutuliti”. U Riacquistu hà parmissu di metta in risaltu una leva nova di donni chì scriviani. Lucia Santucci ni faci parti. Incù a so puesia “Sò tessuta” prisenta a cundizioni cumplessa di a donna corsa di a so epica.
A pueta si sprimi à a prima parsona da definiscia l’identità soia ma dinò cullittiva, è podassi ancu militanti. Hè un attu putenti d’affirmazioni : dicu à u mondu quali socu. Tandu, comu hè, sta donna ? Hè tissuta. Da tanti culori, appaghjati ugnunu à un’attività o à un’emuzioni. A donna pudaria essa “fatta”, “impastata”, “custruita”... ma hè “tessuta” da tutti i rolli è i faccendi chì sò i soii. Eppo’, a donna tessi dinò u filu di a vita, di a mimoria, di a storia, di i generazioni, di u tempu… Apparisci com’è un punteddu à mezu à tuttu stu muvimentu.
A metafora di a tissitura ùn hè micca neutra. D’altrondi, sta simbolica si ritrova in a mitulugia greca o rumana, incù i trè Moire o Parchi. Sti dei erani incaricati di tessa i fili di a nascita, di u distinu è di a morti di l’umani. A donna discritta quì hè una è parechji : mamma, fiddola, suredda, innamurata, affaccindata… corsa è universali in fini di contu !
Explication en français
Explanation in english
